有一種愛，叫做匿埋偷偷想你。
唔再問妳今日過得好唔好，唔再提醒妳食飯、休息、唔好做到太夜。唔再將每一份擔心變成訊息，亦唔再期待電話另一邊出現任何回應。
只係喺某啲安靜嘅時候，忽然想起妳。
可能係見到一杯熱飲，可能係聽到一句熟悉嘅說話，又可能只係夜深落嚟，四周冇晒聲音，心入面某個一直冇真正關上的角落，輕輕郁咗一下。
從前我以為，在乎一個人，就應該讓她知道。
後來先明白，有啲在乎講得太多，會變成壓力；有啲牽掛行得太近，會越過界線。當一段關係已經走到應該停低嘅地方，再用愛做理由靠近，未必係溫柔。
所以而家，我只係匿埋想妳。
唔係等妳回頭，唔係幻想有一日可以重新開始，亦唔係想證明自己曾經有幾重要。只係承認，妳的確喺我生命入面留低過一啲痕跡，而嗰啲痕跡，唔需要勉強刪走。
我仍然會記得妳，但我會尊重妳而家嘅生活。
我仍然會擔心妳，但我唔會再假設自己有資格照顧妳。
我仍然希望妳平安、健康，喺冇我參與嘅日子入面，都可以好好生活。
或者真正克制嘅愛，唔係一定要擁有，亦唔係不停出現。
而係明明心入面仲有一句說話，最後都選擇收好。
有一種愛，叫做匿埋偷偷想你。
妳唔需要知道。
知道嘅人，只有小傻瓜自己。